హైదరాబాదులో జపనీస్ ట్రెండ్.. ఐస్‌తో తయారైన గ్లాసులో కాఫీ!

హైదరాబాద్ కేఫ్ కల్చర్‌లో ఓ సరికొత్త ట్రెండ్ నగరవాసులను ఆకట్టుకుంటోంది. జపనీస్ కేఫ్ సంస్కృతి స్ఫూర్తితో, నగరంలోని 'ఎట్-సి' (Et-Si) అనే కేఫ్ వినూత్నమైన అనుభవాన్ని అందిస్తోంది. ఇక్కడ ఐస్ ముక్కలు వేసిన కాఫీకి బదులుగా, స్వచ్ఛమైన ఐస్‌తోనే తయారు చేసిన గ్లాసులో కాఫీని సర్వ్ చేస్తున్నారు.

జపాన్‌లోని టోక్యో, ఒసాకా నగరాల్లో ప్రాచుర్యం పొందిన ఈ విధానాన్ని ఇక్కడ ప్రవేశపెట్టారు. సాధారణ ఐస్ ముక్కల్లా కాకుండా, ఈ ఐస్ గ్లాస్ చాలా నెమ్మదిగా కరుగుతుంది. దీంతో డ్రింక్ రుచి, ఉష్ణోగ్రత సమయం గడిచేకొద్దీ మారుతూ, ఓ కొత్త అనుభూతిని ఇస్తుంది. ఈ గ్లాస్‌లోని డ్రింక్ తాగే కొద్దీ, అది లోపలి నుంచి కరుగుతూ వస్తుంది.

ఈ ప్రత్యేకమైన ఐస్ గ్లాస్ తయారీకి 48 నుంచి 56 గంటల సమయం పడుతుంది. RO, UV టెక్నాలజీలతో శుద్ధి చేసిన నీటిని నెమ్మదిగా ఫ్రీజ్ చేయడం వల్ల ఇది పూర్తి పారదర్శకంగా, దృఢంగా ఉంటుంది. అందుకే ఈ గ్లాస్ దాదాపు 45 నిమిషాల పాటు కరగకుండా ద్రవాన్ని నిల్వ ఉంచుతుంది.

రెండు, మూడు నెలల పరిశోధన తర్వాత ఈ కేఫ్ యాజమాన్యం ఈ విధానాన్ని ప్రారంభించింది. ప్రస్తుతం మెనూలో టిరామిసు లాటే, చాక్లెట్ మౌస్ మోకా, హాట్ చాక్లెట్ అఫోగాటో వంటి వెరైటీలు అందుబాటులో ఉన్నాయి. ఒక్కో డ్రింక్ ధరను రూ. 595గా నిర్ణయించారు. హైదరాబాద్ ఎండల నుంచి ఉపశమనం పొందాలనుకునే వారికి ఇదొక వినూత్నమైన, ఆకర్షణీయమైన ఎంపికగా నిలుస్తోంది.